| |
Ríos para a vida.
A densa rede fluvial do noso país posúe
un notábel interese natural, sendo unha das máis
valiosas de Europa. Porén, durante as últimas
décadas sofreu innumerábeis agresións:
contaminación, destrucción de bosques autóctonos
de ribeira, construcción de grandes encoros e minicentrais,
pesca abusiva, canalizacións, introducción de
especies piscícolas alóctonas, etc. Os nosos
ríos teñen cada vez menos vida.
O preocupante proceso de deterioración
dos ríos galegos avanza. Cómpre que os poderes
públicos aumenten os investimentos destinados á
mellora do medio fluvial e corrixan todas aquelas políticas
sectoriais que inciden negativamente sobre os ríos
(hidrolóxica, enerxética, forestal,...).
O obxectivo da campaña “Ríos
para a vida” é contribuír á mellora
do estado de conservación dos nosos ríos. Abrangue
a distribución de carteis e trípticos, a realización
de charlas, limpezas dos ríos, plantacións de
árbores autóctonas e a organización dunhas
xornadas sobre os ríos galegos (Santiago, 29 e 30 de
abril de 2000).
A FEG e as asociacións que a forman
rexeitan e denuncian habitualmente numerosas agresións
ao noso medio fluvial: minicentrais, encoros, vertidos de
augas residuais, talas do bosque de ribeira, canalizacións,....
A FEG defende un maior esforzo na prevención
e control da contaminación fluvial, unha nova política
hidrolóxica que promova o aforro e a mellora da eficiencia
na utilización da auga, o rexeitamento de todos os
novos encoros hidroeléctricos (Galiza xa produce a
cuarta parte da enerxía hidroeléctrica española),
o ordenamento adecuado da instalación de minicentrais,
o mantemento de réximes de caudais ecolóxicos
mínimos en tramos obxecto de aproveitamentos hidroeléctricos,
a conservación dos bosques de ribeira e a xestión
sustentábel da pesca fluvial.
Conxuntamente coa Federación Galega
de Pesca Fluvial, a FEG elaborou o documento Ríos
para a vida, con propostas dirixidas ás Administracións
para a conservación e o uso sustentábel dos
ríos.
Os ríos son moito máis
que canles de
auga, son ecosistemas vivos.
|
|
