|
PROFESORES DA USC DENUNCIAN O IMPACTO AMBIENTAL NEGATIVO DOS TRABALLOS DE RECOLLA DE FUEL Demandan respecto aos hábitats costeiros |
|
|
A iniciativa da Federación Ecoloxista Galega (FEG), un grupo de profesores e catedráticos dos Departamentos de Botánica, Zooloxía e Ecoloxía da Universidade de Santiago de Compostela (USC) vén de asinar un manifesto que denuncia "as numersoas e innecesarias actuacións ambientalmente negativas observadas desde o inicio dos traballos de recolla do fuel vertido polo Prestige". Estas actuacións están a provocar "serios danos ambientais" que non poden ser ignorados ou menosprezados, a pesar da situación de emerxencia na que estamos inmersos. A FEG ten denunciado en varias ocasións perante responsábeis do Ministerio e da Consellería de Medio Ambiente a necesidade de planificar os traballos de recollida de fuel de forma que se eviten danos a ecosistemas tan valiosos e fráxeis como as dunas. Mesmo chegou a presentar unha denuncia perante o Servicio de Protección da Natureza (SEPRONA) da Garda Civil. Nestes momentos, a FEG está a preparar un informe sobre o impacto causado pola marea negra e os traballos incorrectos de recollida de fuel nas zonas propostas para a Rede Natura 2000. A continuación reprodúcese integramente o manifesto coa relación de profesores e catedráticos que o asinaron: POLO RESPECTO AOS NOSOS HÁBITATS COSTEIROS Os investigadores que asinamos este documento denunciamos as numerosas e innecesarias actuacións ambientalmente negativas observadas desde o inicio dos traballos de recolla do fuel vertido polo Prestige na costa galega. A realización destes traballos sen unha adecuada planificación que teña en conta a riqueza, diversidade e fraxilidade dos hábitats costeiros, especialmente das dunas, está a a provocar serios danos ambientais que se suman aos ocasionados polas mareas negras. A apertura indiscriminada de pistas, a instalación de balsas ou a circulación incontrolada de maquinaria pesada en zonas de alto valor ecolóxico e paisaxístico, así como a degradación innecesaria das dunas, son danos ambientais importantes a engadir aos producidos directamente pola marea negra. Entre as áreas máis afectadas figuran a Costa da Morte, Carnota ou a Costa da Vela. A situación de emerxencia xerada pola catástrofe ecolóxica provocada polo afundimento do Prestige e as mareas negras sucesivas puido nun primeiro momento xustificar algún erro, pero transcorridos máis de dous meses xa se tivo tempo suficiente para pasar da improvisación á planificación adecuada das actuacións. Sen embargo, a situación dista moito aínda de ser a axeitada e, nestes momentos, son principalmente as propias empresas encargadas de prestar apoio e asesoramento técnico á retirada de fuel as que operan segundo o seu parecer, sen ter en contra criterios ambientais. Non compartimos a opinión de que nalgúns casos é máis conveniente destruír e logo rexenerar. Só aceptaríamos isto cando fosen inviables opcións respectuosas. Mais cónstanos que estas opcións non foron valoradas, e que moitas das actuacións son de difícil rexeneración ou que éstas non van ter lugar, particularmente en canto a novos accesos, pois estanse executando para que fiquen de xeito permanente. O Parque Nacional das Illas Atlánticas non é o único espacio natural protexido de Galicia que está afectado pola marea negra. Lembramos que na costa galega existen espacios protexidos (entre eles un Parque Natural, 2 Zonas de Especial Protección das Aves, 3 Zonas Ramsar e 14 Lugares de Interese Comunitario), que xa sufriron o impacto de 5 mareas negras consecutivas e de actuacións irrespectuosas nos labores de recolla de fuel. Esiximos da Administración ambiental galega e española unha actitude consecuente coa conservación dos importantes valores naturais das nosas costas. Demandámoslles que non permitan ningunha agresión innecesaria máis sobre as especies de flora e fauna, os hábitats e a paisaxe. Solicitámoslles que procedan á restauración de tódalas áreas danadas e que promovan accións de información e educación ambiental sobre a importancia e valores das dunas e doutros ecosistemas litorais. Jesús Aboal Viñas. Profesor do do Departamento
de Ecoloxía e Bioloxía Celular. |
|