Oceanos, un patrimonio a defender.

Os oceanos xogan un papel moi importante na regulación do clima e albergan un 80% da diversidade biolóxica do planeta, aínda sen descobrir en grande medida. Moitas actividades económicas dependen dos mares. 500 millóns de persoas viven en todo o mundo gracias ás diversas actividades ligadas aos mares.

Galicia, con 1.700 quilómetros de costa, é un país moi vinculado ao mar. O sector pesqueiro e marisqueiro ten unha grande importancia na nosa economía. A actividade turística concéntrase no litoral durante o verán. Por mar emigraron a América centos de miles de galegos e galegas na procura de mellores condicións de vida.

Esta campaña procura aumentar a conciencia da sociedade galega sobre a necesidade de conservar os fráxeis e ameazados ecosistemas mariños. Cómpre asumirmos que os recursos oceánicos deben ser usados de xeito ecoloxicamente sustentábel e entendermos que a capacidade dos mares para asimilar os impactos ambientais é limitado.

A deterioración dos oceanos é un feito cada vez máis preocupante e ameaza seriamente o benestar da especie humana. As causas de degradación dos mares son a contaminación, a sobreexplotación pesqueira, a alteración do medio físico e a introducción de especies alóctonas.



O vertido de lixo desde terra e desde os barcos
é unha das causas de degradación do medio mariño.