Compostaxe.
Unha alternativa necesaria.

O obxectivo desta campaña é divulgar a necesidade e a viabilidade da transformación da materia orgánica do lixo en abono (compost), así como promover hábitos entre os cidadáns e cidadás que contribúan a resolver adecuadamente o problema do lixo.

A materia orgánica representa a metade do lixo que xeramos. Está formada principalmente por restos de alimentos. A materia orgánica dos residuos urbanos pódese reciclar xunto con outros residuos orgánicos (lamas de depuradoras, restos vexetais,...) mediante a compostaxe. Existen numerosas iniciativas exitosas de compostaxe en toda Europa.

A campaña inclúe accións como a distribución de trípticos informativos, a recolla de sinaturas a favor da compostaxe, a instalación de mesas informativas na rúa ou a realización de charlas.

A campaña pretende, por unha banda, apoiar a implementación dos planos de xestión do lixo baseados na compostaxe e na reciclaxe promovidos por algúns Concellos e, por outra banda, demandar ao resto dos Concellos e á Consellería de Medio Ambiente que promovan a elaboración e a utilización de compost.

A FEG non apoia o sistema de tratamento do lixo de SOGAMA SA, entre outras razóns porque este sistema rexeita totalmente a compostaxe e reserva un papel moi modesto á reciclaxe. SOGAMA SA entende a xestión do lixo como un negocio, polo que prefire queimar toda a materia orgánica para producir electricidade. SOGAMA SA, empresa formada pola Xunta e por Unión Fenosa, non vai reciclar todo o lixo reciclábel.

Os expertos independentes sosteñen que o compost elaborado a partir da materia orgánica do lixo recollida selectivamente sería de grande utilidade para moitos solos galegos (agrícolas, degradados por actividades diversas,...). Aínda que toda a materia orgánica do lixo galego se empregase para elaborar compost, só se cobrirían unha mínima parte das necesidades de materia orgánica dos nosos solos.